Dual Painted Tunes 2 橙迷必備入耳

小編聲云平日隨身攜帶嘅試音伙伴係Westone嘅4R, 今日有位朋友介紹我試下隻 Dual Painted Tunes 2, 佢知我係橙色愛好者, 基本上身邊咩都係橙色為主, 我鍾意橙色原因好簡單, 就係夠sharp夠醒神。

有玩開耳機嘅朋友都知兩款耳機都唔係同一檔次, 基本上係西柚同橙嘅比較。 不過點都好想試試, 一來朋友介紹到, 而且自己玩得多4R都想知道自己聽野去到幾”奄尖”。盒 Dual Painted Tunes 2 一入手, 睇個盒平平無奇, 但一打開個盒真係俾佢個設計嚇親, 眼前見到嘅係一條耳機線同一枝油彩!!!??? 心諗點解盒耳機裡面會有枝油, 哦！再望真啲原來係用黎裝住條線嘅耳線套, 方便用家行街時攜帶。

講講個設計先, 成隻耳機款式主打藝術品味, 由耳機線到耳線套都以畫畫為中心去設計, 時尚得黎帶點潮流特色, 跟其他品牌耳機設計上較創新, 所有配件都以橙色為主, 真係夠晒醒神, 岩晒我心意, 戴住係街都幾引人注目, hehehe。開箱後除左係鐵盒內搵到耳機同埋耳線套外, 還可以搵到附送的不同大小耳膠同埋耳線索帶, 作用是吸在手機上從而固定耳線, 用家可以將耳機線固定在手機上, 頗方便的設計!!

好啦終於到重點啦, 再重申多次我唔會同其他耳機比較。用左首Maroon 5嘅Lucky Strike同王菲嘅愛與痛的邊緣嘅Wav試, 前者主要試Bass, 後者主要試人聲, 聽Lucky Strike時 Dual Painted Tunes 2 俾我嘅感覺係Bass仍算夠出, 不過可以做得更好, 背景樂器與歌手聲音層次分明度可以接受, 鼓聲若然更實成件事會更佳。到第二首歌, 王菲相信聽過嘅朋友都會同意聽王菲係聽聲, 試過後感覺層次上鮮明度唔太到位, 阿菲把聲未完全突出到, 不過啲音色在這個價黎講做到圓滑感都算唔錯, 二百幾買到這個質素都無野可以挑剔吧!

結論係如果您係入門玩家, 對音質要求唔太高, 而且想要啲外型較特別, 與眾不同的耳機, 可以考慮這款產品。若果您係鍾情於橙色又或者您係個藝術家或藝術愛好者, 我相信您必定會見到這隻 Dual Painted Tunes 而心動。